Ynja.net

Húsgögn eiga 9 líf

kristjana — Sat, 13 Aug 2011 17:47:23 +0000

Handlagna fagurkera dreymir oft um að gefa gömlum húsgögnum nýtt líf. Þau geta orðið verulega falleg ef rétt er að verki staðið.

Ef að viðurinn í húsgögnunum sem stendur til að gera upp er heill og góður er hægt að gera þau upp sem ný. Það sem þarf til er þolinmæði, góðar hugmyndir og réttu tækin og efnin.

Undirbúningurinn tekur mestan tíma. Best er að nota vatnslakk til verksins þau eru umhverfisvænni en önnur lökk í boði. Það þarf að hafa í huga að þau þorna hratt svo að best er að hafa raka tusku við höndina. Þá þarf að kaupa sérstaka pensla í vinnu með vatnsþynnanleg lökk.

1. Fjarlægið fitu og óhreinindi með málningarhreinsi. Skolið vel.

2. Ef að um verksmiðjulökkuð húsgögn er að ræða skal pússa með sandpappír 240-300. Ef að viðurinn er ómálaður þarf að slípa og þurrka fletina. Notið fyrst grófan sandpappír númer 100-120 og síðan fínni pappír númer 180 – 240. Ef að það eru ójöfnur í viðnum er best að spartla í þær og slípa svo niður með fínum sandpappír.

3. Málið tvær umferðir með vatnslakki, slípið á milli umferða. Vandið ykkur og ef að um stóra fleti er best að nota filtrúllu eða góðan vatnsmálningarpensil.

Matarbloggið: Í anda Lucille Ball

kristjana — Sun, 07 Aug 2011 12:40:36 +0000

Við rákumst á matarbloggið The Pioneer Woman á dögunum. Síðuna rekur meistarinn hún Ree sem segist vera aðþrengd eiginkona, sem búi í sveit og lifi í anda Lucille Ball, Vivien Leigh og Etherl Merman. Heljarinnar mix af konum í eldmóð og hún er líklegast ekki að ýkja.

Á síðunni er að finna heilmikið af mataruppskriftum sem eru svo lystugar að allur megrunaráróður fellur kylliflatur. Eftir lesturinn neyðist kona út í búð eftir meira smjöri og rjóma og kominn tími til! Hvar hafið þið verið feitu mjólkurvörur?

Allar leiðbeiningar eru skrifaðar af nákvæmni og þeim er auðvelt að fylgja og þær eru hnyttnar og því ljóst að engu er logið um áhrif Lucille Ball á þessa aðþrengdu búkonu.
Við erum hrifnar af pizzum með geitaosti, rabarbaramulningi með rjóma og guðdómlegri uppskrift að salsa-ídýfu. Njótið: http://thepioneerwoman.com/

Í spilun: Konkylie

kristjana — Sun, 07 Aug 2011 12:17:12 +0000

Í Saints Go Machine eru hljómborðsleikarinn Jonas Kenton, trommuleikarinn Silas Moldenhawer sem báðir eru áhugamenn um hústónlist, jassistinn og sálartónlistarmaðurinn Simon Mushinsky og söngvarinn kúnstugi Nikolaj Manuel Vonsild. Sveitin semur danskt draumapopp og hljómurinn er nýstárlegur. Síðasta plata þeirra kom út í júní og heitir Kynkolie.

Hér er lagið Add Ends af Konkylie. Fallegt lag og gallsúrt myndband.

When Saints Go Machine – ADD ENDS from Dawn Carol Garcia on Vimeo.

Páskagóðgæti: Kanínubollur með kremi

arna — Fri, 15 Apr 2011 13:46:45 +0000

Kanínubollur eru gerðar úr vatnsdeigi og eru með vanillukremi inní. Þær eru æðislega góðar og alveg mátulega sætar. Þessi uppskrift er að Choc Eclairs sem er unaður með espresso eftir matinn. Aldeilis hægt að slá 2 flugur í einu höggi ef um matarboð með börnum og fullorðnum er að ræða og allir fá eftirrétt.

Þú þarft: Bökunarplötu, bökunarpappír, Pott, Sigti, ziplock poka eða sprautupoka, Tannstöngul.

Vanillukremið inn í bollurnar búið til fyrst:
300 mL mjólk
1 egg (hrært)
2 msk. sykur
2 msk. hveiti
vanillludropar
Byrjum á að hræra eggin
1. Setjið þeytt egg, mjólk, sykur og vanillu í pott og hitið á miðlungshita

2. Sigtið hveitið í og hrærið með písk.

3. Hrært í 13-15 mínútur þar til þetta verður kremað.
4. Þegar kremið er orðið þykkt er það sett í skál og plastfilma lögð alveg ofan á kremið til að forðast það að skán myndist ofan á. Kælt í kæli þar til nota á í bollurnar.

Vatnsdeigsuppskrift:
Ég byrjaði á að nota uppskrift með smjöri, en náði einhvern vegin að klúðra því. Gúglaði vatnsdeigsbollur og datt niður á þessa uppskrift Davíðs Freys Jóhannssonar hjá Mosfellsbakaríi. Í henni er notað smjörlíki en hún virkar svona ofsalega fínt:

Innihald:
175 g smjörlíki
310 g vatn
185 g hveiti
4 egg (50 g stykkið)
Hnífsoddur af hjartasalti sett í lokin.

1. Takið til hveiti. Og þeytið eggin (best að þeyta 3stk og geyma eitt til að bleyta í í lokin, þetta er sett út í smám saman og kannski þarf ekki öll eggin).
Nú er þetta tilbúið fyrir seinni stig.

2. Vatn og smjörlíki sett í pott og hitað að suðu.

3. Potturinn tekinn af hita og hveitið sett út í. Hrært vel með sleif þar til deigið er kekkjalaust og losnar frá börmum pottsins.

4. Eggin sett saman við, eitt í einu, og hrært mjög vel á milli.

5. Deigið á að vera algjörlega slétt og kekkjalaust en nógu þykkt til að halda lögun sinni. Hjartarsalt á hnífsoddi sett í lokin.

6. Sprautað úr sprautupoka, eða sett með skeið á plötu. Ég notaði ziplock poka frá Ikea. Þeir henta frábærlega vel í svona, deiginu er skóflað með skeið ofan í pokann, mesta loftið tekið úr og zip-lokað. Svo klippir maður gat á eitt hornið sem samsvarar um það bil breidd bollanna. Ef gatið er of lítið gæti pokinn rifnað þar sem deigið er svo þykkt.
Sprautið aflangar bollur og síðan eyru með því að stinga endanum á pokanum aftur inn í bolluna á endunum og draga út.
Þessi umferð af bollum var gerð með vatnsdeigi í þynnsta móti, þær mega alveg vera stífari og meiri bollur en þetta.

Hafið gott bil á milli bollanna. Bakið við um það bil 200 C° í um það bil 15-18 mín., mismunandi eftir ofnum.

Ég prófaði að baka á um 180C° vegna þess að ég er með nýjan ofn sem er svo mikið súper. Bollurnar komu fínt út, en líklegast vilja þær frekar vera nær 200 C°, sumstaðar hef ég lesið uppskriftir sem segja að síðustu mínúturnar eigi að hækka hitann upp í 220 C°. Þið prófið bara.

Bollurnar púffast út í lok bökunartímans og snarka í eigin smjöri. Þær eiga að verða gulbrúnar bæði ofan á og á hliðum.

Skerið gat á bollurnar og fyllið með vanillukremi.

Og þá byrjar fjörið!
Búið til venjulegt flórsykurskrem (flórsykur og eggjahvíta fyrir mjög stíft krem, annars bara flórsykur og vatn), smávegis af hvítu kremi og smávegis af brúnu flórsykurskremi (bæta við smá kakó).
Notið nú tannstöngulinn til að gera nebba og veiðihár með brúna kreminu, og hvíta kremið býr til augu.
Og smá doppa af brúna kreminu sett ofan á hvíta.

Eða einfaldlega bara nota bara súkkulaðikremið:

Þessar bollur eru æðislega góðar, ekki síst vegna þess að vanillukremið inni í þeim er ekki svo rosalega sætt, rétt mátulega.

Fyrir ykkur sem eruð ekki fyrir svona kanínuvesen má gera aðeins meira elegant týpu, sem er í raun Choc Eclairs

Hvort sem þið veljið, þá eru þær góðar, og kalla fram bros.

Páskaborð

arna — Tue, 29 Mar 2011 15:02:11 +0000

Páskar eru uppáhalds. Frí til að liggja í leti og smjatta á góðgæti.
Við skreyttum og gerðum fínt fyrir páskana. Hér leynast nokkrar hugmyndir að fínum páskum.

Texti: Arna Ösp Guðbrandsdóttir

Myndir: Kolfinna Mjöll Ásgeirsdóttir

Topp 10 leiðir til að rugla í rútínunni

kristjana — Mon, 28 Mar 2011 12:45:56 +0000

Orðin eirðarlaus? Komin í svo pikkfasta rútínu að þú geispar ósjálfrátt yfir eigin spegilmynd? Vá það er komin tími til að hrista upp í þessu öllu saman. Héðan í frá er þér bannað að gera nokkurn einasta hlut á sama hátt hvern dag og hér eru góð ráð til þess að hjálpa þér!

1. Ný morgunrútína

Vakna, sturta, kaffi, grauturinn, hvar eru lyklarnir og síminn, út? Nei takk. Má ekki hrista þessa rútínu aðeins til? Mundu eftir því að kveikja á tónlist meðan þú hefur þig til og hafðu fyrir morgunmatnum. Við erum skotin í Eryku Baduh! Vertu búin að strauja fötin þín kvöldinu áður og eyddu góðum tíma í að dorma í ilmandi baði. Dekurstund á morgnana er það mögulegt? Já það höldum við nú!

2. Nýr ferðamáti og önnur útsýnisleið

Skildu bílinn eftir heima og vippaðu þér á hjólið eða upp í strætó. Farðu úr vagninum fyrr en venjulega ef að gönguleiðin er fögur. Ferska loftið og ráðrúmið til að hugleiða aðeins áður en þú stimplar þig inn gefur þér magnað forskot sem þú sérð ekki eftir að vinna þér inn.

3. Hugsaðu upp á nýtt

Vaninn er svo hræðilegur djöfull. Þú sest við skrifborðið og gerir allt í sömu röð. Opnar póstinn, færð þér kaffi, segir það sama við vinnufélagann og í gær. Teygir þig í blindni eftir hlutum á skrifborðinu og í hádeginu nöldrið þið vinnufélagarnir í kór yfir ömurlegu mötuneyti og ruglinu í yfirmanninum. Jahér. Spennandi? Lestu fagtímarit og greinar sem tengjast vinnunni og gefðu vinnufélögunum og þér smá stuð. Hafðu vinnuumhverfið spennandi. Hvetjandi myndir og hluti í kringum þig. Og síðast en ekki síst ef að mötuneytið er svona ferleg uppspretta óhamingju þá slepptu því að mæta og komdu með heimalagað lasagna handa vinnufélögunum.

4. Hádegisbrellustund

Hvort sem þú skellir þér ein á kaffihús og lest uppáhaldstímaritið þitt. Skellir þér í jóga eða smá hjólatúr um nágrennið þá er hádegið þvílík brellustund. Þú getur gert hvað sem þér flýgur í hug. Reyndu að gera eitthvað nýtt á hverjum einasta degi og það er harðbannað að borða samloku fyrir framan tölvuskjáinn (nema það sé eitthvað framandi og nýtt fyrir þér!) Funkylunch!

5. Áhugamál! Áhugamál! ÁHUGAMÁL

Ein helsta ástæða þess að við föllum í fúla rútínu er að við erum ekki að rækta ný áhugamál. Ef þú ert farin að fá kvíðakast yfir því að “þurfa” að gera eitthvað nýtt og finnst ekki nokkur skapaður hlutur vera “þú” þá ertu í slæmum málum. Þú ert leiðinleg. Úps. Jæja þá er það farið frá. Gerðu nú eitthvað. Stofnaðu matarklúbb. Stefndu á að hlaupa 10 kílómetra í maraþoni. Lærðu að búa til magnaðar bréfskutlur! Reimaðu á þig dansskóna og lærðu að dansa tangó! Gerðu bara eitthvað annað en að sitja eins og hrúgald og kvarta yfir tilverunni sem er ekki rómantísk bíómynd með þig í aðalhlutverki.

6. Ruglaðu í samskiptamynstrinu

Ertu útlagi? Fýld og afundin og dottin úr takti? Eða orðin eirðarlaus í sama félagsskapnum þar sem sömu reglur, siðir og venjur eru rituð með blóði? Hringdu í vini sem þú hringir ekki venjulega í og líttu út með þeim. Grillaðu með nágrönnunum. Haltu hverfishátíð. Stofnaðu klúbba. Faðmaðu vini sem þér þykir vænt um. Lífið verður svo flatt og hversdagslegt án fólksins í kringum þig. Félagslíf gerir þig ríka og glaða og vini er alls staðar að finna ef þú vilt raunverulega finna þá. Ef þú ert alger byrjandi þá kannski byrjarðu á því að læra að faðma: Hér eru leiðbeiningar.

7. Hresstu við bragðlaukana

Ýsa með kartöflum, hrísgrjón og eitthvað karrýmauk úr dós með kjúklingi, pasta, pasta og meira pasta. Hrikalega leiðigjarnt að horfa á sama matarskammtinn dag eftir dag. Hugsaðu út fyrir þinn litla disk og reyndu eitthvað nýtt. Búðu til pizzu með óvenjulegu áleggi, vatnsmelónur, rúcolasalat og parmaskinka, fáðu þér hálft glas af hvítvíni með. Lambakótilettur með bláberjasósu og rauðspretta í ritzkex hjúp. Notaðu hugmyndaflugið og leyfðu skynfærunum að leiða þig áfram.

8. Lestu um nýja heima

Ef að möguleikar þínir eru takmarkaðir vegna erfiðs fjárhags eða veikinda þá má alltaf víkka sjóndeildarhringinn með því að lesa og skoða. Fáðu magnaðan innblástur með því að lesa ævisögur þinna helstu fyrirmynda, lestu um undur veraldarinnar og reyndu að sjá heiminn upp á nýtt. Hann er enda magnað fyrirbæri og lífið verður fyrst leiðinlegt þegar þú gleymir því!.

9. Vertu hugrökk og lentu í ævintýrum

Gungur njóta illa lífsins. Þær fela sig og fresta. Þær festa sig í rútínu til þess að þjóna eigin vanmætti og hugleysi. Hertu þig og hentu þér út í hringiðuna. Aragrúi ævintýra bíða þín.

10. Ræktaðu ástina og vinskapinn

Ertu ein af þeim sem gefur ekkert eftir? Fúlastu rútínurnar felast í okkar daglegu samskiptum við okkar nánustu. Kærastinn þinn bara á að segja eitthvað fallegt við þig og dekra við þig, vaska upp og þrífa og sturta yfir þig peningum! Annars tjúllastu og breytist í nöldrandi joggingskrímsli sem andvarpar svo mikið að það mælist í metrum á sekúndu! Slappaðu af. Brostu, hlæðu og vertu vinur. Þannig ræktarðu ástina og færð margfalt launað til baka.

Ungar konur og krabbamein

kristjana — Sat, 26 Mar 2011 11:25:27 +0000

Ungar konur eiga það til að horfa framhjá einkennum sem gætu bent til krabbameins. Stundum er það vegna þess að þeim finnst eins og krabbamein sé vandamál gamals fólks. Það er rétt að sumu leyti, en margt ungt fólk fær krabbamein. Sumir horfa viljandi fram hjá krabbameinseinkennum. Oft er það afneitun, en sumir halda að allt krabbamein sé ólæknanlegt og því skipti engu máli hvað er gert eða ekki gert.

Líta þarf á möguleg einkenni um krabbamein með hæfilegu raunsæi. Ekki of mikilli afneitun og ekki heldur með móðursýki.

1. Óútskýranlegt þyngdartap

Flestum konum er ekkert á móti skapi að missa nokkur kíló. Ef það gerist hins vegar án þess að venjur í mat eða þjálfun hafi breyst ætti að kanna málið.

2. Þroti

Konur eru nú svo kunnugar því að vera þrútnar og bjúgaðar eftir því hvort er 5. eða 20.dagur mánaðar. En vatnssöfnun og stækkaður magi eins og vill verða í svona þrotatilfellum geta bent til leghálskrabbameins. Aðrir kvillar sem gætu fylgt eru magaverkur eða verkur í mjaðmagrind, að finna fljótt fyrir seddu – jafnvel þó þú hafir borðað lítið – og svo þvagvandamál. Að þurfa að flýta sér á klósettið til dæmis.

Ef bjúgur og þroti er viðvarandi, yfir nokkrar vikur, ættirðu að láta kanna það.

3. Breytingar á brjóstum

Flestar konur þekkja vel á sér brjóstin, jafnvel þó þær skoði þau ekki reglulega mt.t. krabbameinsleitar. Þær vita af því að hnúta í brjóstum ætti að láta athuga en það er ekki það eina sem getur bent til krabbameins.

Roði og þykknun húðar yfir brjóstinu getur verið merki um að brjóstakrabbamein sé til staðar. Ef þú ert með útbrot sem fer ekki svo vikum skiptir verðurðu að láta athuga það.

Eins ef útlit geirvörtu breytist, eða ef þú sérð vökvaútferð úr henni. Geirvörtur sem hafa alltaf verið framstæðar en verða svo innfallnar þarf að kanna. Innfallnar geirvörtur eru eðlilegar í sjálfu sér, það er breytingin sem gefur tilefni til að hafa áhyggjur.

4. Milliblæðingar eða aðrar óvenjulegar blæðingar

Konur horfa oftast framhjá því ef um milliblæðingar er að ræða vegna þess hve algengt það er hjá konum yfirleitt. Hver kona þarf þó að vega og meta út frá sjálfri sér hvað er eðlilegt. Ef hún hefur alltaf verið regluleg og aldrei haft milliblæðingar, en byrjar svo að taka eftir slíku, þá telst það óvenjulegt miðað við hana og ætti að láta lækninn vita.

5. Húðbreytingar

Flestar okkar vita að við eigum að fylgjast með því hvort við sjáum breytingar á fæðingablettum þar sem það er vel þekkt merki um húðkrabbamein. Við ættum líka að fylgjast með breytingu á húðlit.

Ef þú færð þurra húð eins og hreistur og ef blæðir úr húðinni skaltu láta lækni líta á. Ekki láta það bíða lengur en í nokkrar vikur þó að þetta geti verið exem eða annað smávægilegt.

6. Erfiðleikar við að kyngja

Gætu bent til krabbameins í meltingarvegi, tildæmis í vélinda. Ef þú átt erfitt með að kyngja og hefur jafnvel breytt um fæðu vegna þess skaltu láta lækninn kíkja á þig.

7. Blóð á röngum stöðum

Blóð í þvagi eða hægðum getur komið frá gyllinæð, en það gæti líka komið frá krabbameini í ristli, blöðru eða nýrum. Ef þú hóstar blóði ættirðu líka að láta líta á þig. Það getur verið merki um hvað sem er, að sjá blóð á röngum stöðum. En gerist það oftar en einu sinni er rétt að fara til læknis.

8. Verkir í maga og þunglyndi

Kona sem kvartar yfir miklum verk í maga og þunglyndi þarf að fara í skoðun. Rannsóknir hafa bent til tengingar milli þunglyndis og krabbameins í brisi. Ástæður tengingarinnar eru ekki vel þekktar.

9. brjóstsviði

Konur sem hafa verið óléttar gætu munað eftir því hvernig seddutilfinning og brjóstsviði varð algengari eftir því sem þær þyngdust. Ef engin sýnileg orsök er fyrir brjóstsviðanum gæti verið hættumerki. Það gæti verið fyrstu merki um krabbamein í vélinda, maga eða hálsi.

10. Breytingar í munni

Reykingamenn ættu sérstaklega að vera á varðbergi fyrir hvítum skellum í munni eða hvítum blettum á tungunni. Hvort tveggja getur bent til þess að um forstig krabbameins í munni sé að ræða.

11.Sársauki

Eftir því sem fólk eldist virðist það kvarta meira undan verkjum og sársauka af öllu tagi. Þó að verkir séu sjaldnast vegna undirliggjandi krabbameins geta sumir verkir verið merki um frumstig krabbameins.

12. Breytingar á eitlum

Bólgnir eitlar í holhönd eða á hálsi getur bent til sjúkdóms. Eitlar geta bólgnað þegar líkaminn er að berjast við hvers konar sýkingar í líkamanum. Sé bólginn eitill að stækka og hefur verið í meira en mánuð er best að fara til læknis og láta kanna hvers vegna það er.

13. Hiti

Ef þú ert með hita og ekki með flensu er eitthvað annað að í líkamanum. Láttu athuga hvað það er.

14. Þreyta

Mikil þreyta er eitt af litlu atriðunum sem geta bent til krabbameins – auk annarra vandamála auðvitað.

15. Viðvarandi hósti

Þú mátt búast við því að fá hósta með kvefi, flensu eða ef þú ert með ofnæmi. Ef þú hinsvegar ert með hósta sem fer ekki á þremur til fjórum vikum skaltu ekki horfa fram hjá því.

Heimurinn stígur til hliðar

kristjana — Sat, 26 Mar 2011 10:56:08 +0000

Til eru frægar manneskjur sem allir þekkja og eru sammála um að séu sérstaklega viðkunnalegar, farsælar og smitandi í velgengni sinni. Fólkið sem um ræðir er talað um að hafi mikla persónutöfra. Charisma er enska orðið yfir þennan persónueiginleika sem telst frekar sjaldgæfur, en er algengur meðal leiðtoga. Búi maður yfir miklum persónutöfrum er líkt og um segulmögnun sé að ræða. Annað fólk heillast og fylgir leiðtoganum.

Allur heimurinn virðist stíga til hliðar fyrir þá manneskju sem veit nákvæmlega hvert hún er að fara.

Við viljum allar ná markmiðum okkar og vaxa að visku, komast lengra en við hefðum sjálfar þorað að vona. Það myndi ekki saka að kanna hvaða eiginleikum heillandi fólkið sem um ræðir býr yfir sem gefur þeim þvílíkan kraft og farsæld. Það augljósasta er að þau vinna ötullega að einhverju sérstöku hugðarefni. Stefna þeirra er skýr. Þau vita hvert þau eru að fara.

Margt er sammerkt með fólki sem býr yfir miklum persónutöfrum.

Fólk með heillandi persónuleika hefur mikla trú á sjálfu sér og því sem það er að gera. Það er yfirleitt rólegt og yfirvegað yfir sjálfu sér og vinnu sinni. Hversu mikið sjálfstraust fólk hefur sést oft á því hversu hugrakkt það er. Hversu viljugt fólk er til að gera hvaðeina sem nauðsynlegt er til að ná einhverju markmiði.

Yfirleitt laðast allt fólk náttúrulega að þeim sem sýna sjálfstraust, þeim sem hafa endalausa trú á getu sinni til að rísa yfir aðstæðurnar til að ná markmiðum sínum.

Viljirðu styrkja heillandi hluta persónuleika þíns ættirðu að byrja á að æfa þig í að vera hugrökk og sýna sjálfstraust. Fólk dregst að öðrum sem eru öruggir með sig. Hrífandi fólk með mikið sjálfstraust brosir með augunum, snertir viðmælandann, lífgar samkomur við, tekur eftir fólki og tekur því vel.

Lífsgleði er smitandi

Persónutöfrar aukast í hlutfalli við lífsgleði þína. Því spenntari sem þú ert yfir því að ná takmarki þínu því meira er fólk til í að hjálpa þér að gera það. Því meiri ástríðu sem þú hefur fyrir lífinu og því sem þú gerir, því öflugri persónutöfrum býrðu yfir, og því meiri samvinnu máttu búast við af öðrum.

Styrkur sérþekkingar og mikilvægi vandlegs undirbúnings

Fólk sem telur þig hafa mikla þekkingu heillast og virðir þig fyrir að vera einstök á þínu sviði.

Virðing er einmitt það sem gefur fólki aukinn sjarma mun frekar en annað. Mesta virðingu hefur fólk fyrir þér ef þú ert alltaf undirbúin fyrir hvaðeina sem þú gerir. Ef þú ert vel undirbúin er það öllum ljóst hvert þú ert að stefna og fólk virðir þig fyrir það.

Ekki kvarta og ekki afsaka

Sjálfsábyrgð er stór persónuleikastyrkur. Komdu til sjálfrar þín með vandamál og spurningar. Settu nafn þitt á það sem þú gerir. Bjóddu þig fram til að gera það sem þarf að gera og viðurkenndu mistök ef þú átt þau.

Ímynd er hluti af þér – og hún hefur áhrif.

Sjálfsmyndin, hvernig þú sérð þig, hefur áhrif á hvernig þú kemur fram. Hún hefur mikil áhrif á það hvernig aðrir sjá þig og persónutöfrarnir ráðast að stórum hluta af sjálfsmynd þinni.

Ímynd þín, sú mynd af þér sem aðrir skynja, er jafn mikilvæg. Svörun annars fólks og viðbrögð þeirra við þér ráðast af þessari mynd. Fólk sem nýtur velgengni er yfirleitt mjög meðvitað um ímynd sína. Allt skiptir máli. Ef þú brennur fyrir einhverju, ef þú þarft að komast þangað sem þú þarft að komast, er líklega betra að taka mið af þeim bestu í þinni grein – þeim sem búa yfir miklum persónutöfrum – og læra af þeirra ímynd.

Heilindi og heiðarleiki

Persóna sem býr ekki yfir heilindum og heiðarleika mun aldrei komast alla leið að takmarkinu. Þær aftur á móti sem hafa þessa eiginleika á valdi sínu fá fólk í hópum í lið með sér. Þetta eru yfirleitt manneskjur sem hafa sterk gildi og ákveðnar lífsreglur. Viðhorf þeirra til lífsins er raunsætt og þær eru heiðarlegar við bæði sjálfar sig og aðra. Heiðarlegar manneskjur með mikla persónutöfra tala vel um aðra, gæta sín í tali, og gera sér grein fyrir því að hvaðeina sem þær segja getur einhvern tíma verið notað gegn þeim. Allt sem viðkemur persónu þeirra bætir við eða dregur frá sjarmanum sem þær hafa.

Ef við hugsum um mikilvægustu menn og konur hvenær sem er í sögunni hugsum við til manna og kvenna sem höfðu háleit markmið og lífsgildi og kepptust við að standa undir því og gera gott betur. Oftast gerði þetta fólk líka miklar kröfur til annarra um að hafa lífsgildi sín á hreinu.

Þegar þú ákveður að lifa eftir þeim bestu lífsgildum sem þú þekkir byrjar þú að þróa persónutöfra þína.

Án sjálfsaga er ekkert

Mikillar sjálfsstjórnar er krafist af þeim sem ætlar að ná slíkum völdum á sjálfum sér. Sjarmörarnir hafa ótrúlegan eiginleika til að halda innri ró, skipulagi og hafa viljastyrk og ákveðni til að klára hvaðeina sem þeir ætla sér.

Settu þér því skýr markmið. Einsettu þér að verða ákveðin og styddu við markmiðin og leiðina að þeim með óbrjótanlegu sjálfstrausti. Leyfðu þér að vera upprifin og spennt yfir því sem þú ert að gera, hrífðu aðra með þér. Taktu þér tíma í að læra, gerstu snillingur á þínu sviði og undirbúðu þig vandlega fyrir hvert tækifæri sem þú færð til að nota kunnáttu þína. Þú munt geisla persónutöfrum. Takirðu ábyrgð, afsakar þig ekki og kennir ekki öðrum um finnurðu fyrir aukinni sjálfsstjórn og það gefur þér kraft. Hann er undirstaða heillandi persónuleika. Líttu út eins og sigurvegari og aðdáun annarra byggir upp persónutöfrana. Leyfðu persónu þinni að vaxa með því að setja þér sterk lífsgildi og lifðu eftir þeim. Þú öðlast virðingu annarra fyrir það.

Engir peningar? Notaðu hugmyndaflugið

ritstjorn — Wed, 16 Feb 2011 11:01:26 +0000

Það er alger vitleysa að fjárfesta í dýrum mublum og græjum á þessum tímum og fyrir þá sem eiga ekki pening hvort sem er þá er það hugmynd sem er ansi langt frá raunveruleikanum hvort sem er. Það er samt engin ástæða til að láta heimilið drabbast niður. Það má gera ýmislegt fyrir tiltölulega litlar fjárhæðir. Lykilreglan er að hafa lítið af mublum og sanka að sér litlu af drasli og þannig hafa meira pláss til að leika sér. Málaðu einstaka veggi í fallegum litum, dröppuðum, ljósbleikum eða gráfjólubláum. Hafðu gólfefnin klassísk og einföld. Notaðu antíkstóla fyrir bókahillur, keyptu ódýra vegghillu og raðaðu undir hana lausum kössum í stað þess að fjárfesta í dýrri hillu í stofuna. Kauptu þér kertastjaka og kerti og bækur sem þú getur bæði lesið og notið að halda uppá.

Öðruvísi barnaherbergi

kristjana — Fri, 11 Feb 2011 21:46:57 +0000

Vel hannað og skemmtilegt barnaherbergi er þroskandi ævintýraheimur sem ýtir undir bestu eiginleika barnsins þíns. Hugsaðu um hvað barnið þitt hneigist að. Vill það helst leika sér að því að kubba, teikna, föndra eða leika sér í ímyndunarleikjum með brúðum og hlutum? Reyndu að finna hugðarefnum barnsins rúm. Það eru ótal leiðir til þess að gera barnsheiminn enn meira ævintýri en hann nú þegar er. Það er hluti af því að vera gott foreldri að búa barninu góðan stað.

(Legókubbar í yfirstærð fást í Europris. Krítarmálning fæst í Byko. Körfur á föndurvegg fást í Ikea.)