Rabarbari hefur í aldanna rás verið ræktaður í görðum góðra húsfreyja og notaður í lækningaskyni. Síðustu áratugi hefur hann verið notaður í matargerð og allra síðustu misseri hefur hann aldeilis fengið uppreisn æru í nýstárlegri meðhöndlun matargúrúa, rabarbarakaramellur og rabarbaraíste bera þess vitni!

Rabarbarinn er oftast ekki borðaður hrár þótt börnum (og fullorðnum börnum…) finnist gott að dýfa honum í sykur og borða. En passið blessuð börnin því blöðin innihalda eiturefni og þau eru aldrei borðuð!  Rabarbarinn er ógurlega súr og því oftast bakaður eða soðinn með sykri.

Að minnsta kosti tvær tegundir rabarbara finnast hér á á landi, önnur er með rauðum stilk og hin grænum. Sá rauði er fínlegri og aðeins sætari og því þarf minna af sykri með honum.

Aðaluppskerutími rabarbarans er einmitt um þessar mundir og því finnst það okkur það skylda okkar að gera klassíska ömmurabarbarasultu og svo tökum við auðvitað smá tvist og snúning frá klassíkinni og prófum að bæta engifer og appelsínu í sultuna. Þá er ekki úr vegi að leggja á minnið hvernig á að  henda í eina hjónabandssælu, kaka sem klikkar seint með kaffinu.

Klassísk rabarbarasulta

1 kg hreinsaður rabarbari í bitum

1 kg sykur

Rabarbarinn og sykurinn sett saman í meðalstóran eða stóran pott, fyllt upp með vatni og látið standa yfir nótt.

Þegar komið er að því að sjóða sultuna þá er suðan látin koma upp. Best er að leyfa suðunni að koma upp hægt og rólega og halda hitanum í meðallagi því annars er hætt að sultan brenni við. Sultan er hreinlega látin malla og gott er að veiða froðuna sem myndast upp með skeið eða götóttum spaða. Suðutíminn er frjáls, sultan er soðin þangað til hún dökknar. Eftir því sem hún er látin malla lengur dökknar hún enn frekar. Okkur finnst hún best þónokkuð dökk og athugið að hún þykknar ekki mikið meira eftir að hún kólnar.

Eftir sultumallið er sultan sett í hreinar, sótthreinsaðar krukkur. Hellið henni heitri á krukkurnar og fyllið upp í topp. Ekki opna krukkurnar fyrr en sultan hefur kólnað vel. Þegar hún kólnar þéttist hún, sígur niður og það myndast lofttóm.

Rabarbarasulta með smá tvisti

1 kg rauður rabarbari skorinn í litla bita

800 g sykur

50 g sultaður engifer, saxaður smátt

rifinn börkur af 1 appelsínu

Notið sömu aðferð og hér að ofan.

Hjónabandssæla

75 g hafrar

125 g hveiti

75 g púðursykur

½ tsk lyftiduft

½ tsk kanill

Örlítið salt

100 g smjör  lint

100-150 ml rabarbarasultan sem þú lagaðir sjálf!

Ofninn hitaður í 200 gráður. Öllu nema sultunni blandað saman í skál; blandan á að vera mylsnukennd en ekki þurr, það á að vera hægt að móta úr henni kúlu í lófanum. Fjórðungur tekinn frá en hinu dreift í lítið bökuform eða lausbotna tertuform ef það á að bera hana fram á kökudiski. Blöndunni er þrýst niður á botninn og upp með hliðunum. Hafið blönduna nokkuð jafna, engin göt og passið að hún sé ekki of þykk í hornunum. Rabarbarasultunni er síðan smurt á botninn og að lokum er deigið sem tekið var frá mulið jafnt yfir. Þegar við gerum spariútgáfuna af hjónabandssælunni finnst okkur gott að hafa söxuð jarðarber með sultunni. Fyrir þær sem nenna má fletja það út í ræmur frekar en að mylja yfir og leggja ræmurnar yfir sultuna.

Bakað í um 25 mínútur, eða þar til yfirborðið hefur tekið gullbrúnan lit.