Ásgerður Ottesen  hefur frá unga aldri haft áhuga á flestu sem viðkemur tísku. Síðastliðin 2 ár hefur hún haldið úti einni vinsælustu tískubloggsíðu landsins Trendland, þar sem hún skrifar um helsta áhugamál sitt í bland við ýmislegt sem hreyfir við henni hverju sinni.

Ása er mikill fagurkeri, hvort sem kemur að fallegum fötum  eða hlutunum  sem hún velur í kringum sig dagsdaglega.  Á heimili hennar leynast því óendanlega margir áhugaverðir hlutir sem gleðja augað.

Ynjur höfðu samband  og fengu að forvitnast um allskonar uppáhald í lífi Ásu.

Uppáhalds:

Lykt: Af nýlögðu kaffi á morgnana.

Bragð: Súkkulaðikakan hennar mömmu með ískaldri mjólk.

Efni: 100% natural bómull. Ég er sjúk í góð og dýr bómullarefni.

Mynstur: Doppótt hefur alltaf heillað mig. Vandræðalega mikið af doppum í mínum fataskáp.

Litur: Grænn er minn litur, hann kallar fram það græna í augunum mínum.

Flík: Blár palíettujakki. Jakkinn er ein af uppáhaldsflíkunum mínum eins og er. Hann er svo fallega blár og fer einstaklega vel við sólbrúna húð. Svo glitrar hann líka svo fallega í sólinni. Ég keypti hann fyrir 3 árum þegar ég var að vinna í Gyllta Kettinum.

Skór: Það er nú yfirleitt það nýjasta í skápnum hverju sinni. Akkurat núna eru það skór frá Vagabond.

Ilmvatn: Er að leita að því, fæ  hausverk af flestöllum ilmvötnum

.Bók: Skuggi Vindsins fékk mig til að hlæja, vera spennta og gráta. Besta bók sem ég hef lesið.

Land: Svíþjóð því ég er að gæla við skiptinám í Stokkhólmi næstu misseri.

Borg: Reykjavík er best í heimi

Staður á Íslandi: Dimmuborgir við Mývatn er náttúruperla sem ég væri til í að heimsækja einu sinni á ári.

Tónlist: Mér líður alltaf vel þegar ég hlusta á bossa nova tónlist og gleðijazz. Astrud Gilberto til dæmis.

Lag: Never give you up með the black keys

Árstíð: Haustin eru minn tími. Verð alltaf svo hamingjusöm þegar það fer að dimma. Myrkrið er svo dularfullt og kósý.

Kvikmynd: Þessi er erfið, ég á enga uppáhalds þannig séð, en mér finnst japanska teiknimyndin Spirited Away rosalega flott og sjónræn. Söguþráðurinn er fallegur líka.

Hluturinn á heimilinu: Uglan fína úr kisunni er uppáhalds. Ég fékk han

a í 30 ára afmælisgjöf frá yndislegum vinkonum.

Matur: Lambalæri með brúnuðum kartöflum, rauðkáli, gulum baunum og brúnni sósu er unaðslegt.

Orð: Ljúflíngshóll, gæti hugsað mér að koma þangað. Held að þar gerist ævintýralegir hlutir.

Tími dags: Seint á kvöldin þegar flestir sofa fer ég í ham og plana framtíðina. Það á svo margt spennandi eftir að gerast.

Dýr: Api, ég er mikill api sjálf.

Búð: Fríða Frænka, þar er svo margt fallegt sem gleður augað. Verst hvað það er dýrt.

Kaffihús: Súfistinn í Máli og Menningu er bestur. Ég elska að lesa nýjustu tískublöðin og háma í mig köku, en þær eru syndsamlega góðar.

Minning: Þegar bróðir minn kyssti mig bless og sagði love you áður en ég fór í skólann.

Myndir og texti: Kolfinna Mjöll Ásgeirsdóttir