Aukaplássið í garðinum getur gefið þér mikla ánægju. Útiveru, jarðtengingu og hálfgerða hugleiðslu við að róta í moldinni, vökva og að lokum að njóta lífræns heimaræktaðs grænmetis.

Ef þú átt aukapláss í garðinum væri ekki vitlaust að stinga þar upp og setja góða mold, búa til matjurtagarð og njóta lífsins næringar og lystisemda.

Kryddgarðurinn

Matjurtagarðar geta verið ýmiskonar. Sértu týpan til að vera sífellt að marinera og krydda finnst þér líklegast mest spennandi að prófa kryddjurtagarð. Þú gætir prófað dill, kóríander, basiliku og rósmarín. Myntu sem jafnt er hægt að nota með íslensku lambalæri eða í marokkóskt te á sumarkvöldum.

Salatgarðurinn

Salatgarð er gaman að eiga. Að geta stokkið út og náð í Rukola blöð, graslauk og grænkál og sneiða yfir það eldbleika radísu með matnum, það er súper. Kosturinn við salatgarðinn er að þú færð uppskeruna snemma og nýtur hennar allt sumarið. Ókostur fyrir suma er að salatgarðinum þarf að sinna þónokkuð og verjast sniglum.

Eftirréttagarðurinn

Rabbabari og berjarunnar eru einhvern vegin bara sjálfsagðir með matjurtargarðinum. Manstu eftir því að hafa hlaupið um og leikið þér með rabbabarastöngul í munnvikinu? Eða setið í sólinni og stungið stönglunum í sykur ef þeir voru of súrir? Rabbabari er líka fyrirtaksefni í eftirrétti. Rabbabari, sykur, kókos og marsipan í ofni og borið fram með þeyttum rjóma – glæsilegra verður það vart. Nema boðið sé upp á rabbabara- eða berjagraut með rjóma úr postulínskönnu.

Barnaskikar og fjölskyldugarður

Flestum sem byrja með matjurtagarð þykir best að prófa sitt lítið af hverju; kartöflur, rófur og annað rótargrænmeti. Smá skiki undir salat og kál. Eitt hornið fyrir tilraunamennsku í jarðarberjaræktun. Öruggt pláss fyrir graslaukinn. Kryddjurtir á afmörkuðum reit.
Það getur líka verið skemmtilegt að skipta matjurtargarðinum upp í eignarsvæði þar sem hvert barn eða ömmubarn á sinn skika og setur þar niður sínar 3-4 kartöflur, 1-2 káltegundir o.s.frv. Hver sér svo um sinn skika og getur skreytt líka með sumarblómum ef metnaðurinn er svo mikill.

Stígar og landmótun

Þegar búið er að plana hvurslags skipulag garðurinn á að hafa er honum skipt niður og stígar troðnir svo auðveldlega sé hægt að komast að hverju beði. Hægt er að helluleggja stígana eða fá trjákurl hjá gróðrastöðvum til að leggja í þá. Þannig er hægt að krjúpa á hnjánum við að reyta arfann án þess að verða of moldug.

Á náttúran.is fundum við sýniforrit og leiðbeiningar við að búa til “eldhúsgarð” eins og þau kalla. Kíkið líka á það.