Í kreppunni er ráðlegt að mennta sig séu horfur slæmar á atvinnumarkaði. Ungt fólk horfir út fyrir landsteinana og langar að víkka sjóndeildarhringinn. En hvað er til ráða þegar fjárráðin eru lítil?  Við könnum hvað er í boði af hagstæðum en spennandi leiðum til náms í löndum sem þykja vinsæl til dvalar. Við byrjum á Bretlandi.

Bretland heillar alltaf (þrátt fyrir allt saman!).  Þar eru möguleikar til náms miklir og Íslendingar sækja þar í nám í hagfræði, kvikmyndagerð, margmiðlun, tónlist og leiklist, hönnun, menningarfræðum, fjölmiðlun, heimspeki, bókmenntum, ensku og listfræðum.

Skólagjöldin sliga þó marga og fáir vita að hægt er með úrræðagæðum að sneiða hjá háum gjöldum og borga sömu gjöld og Bretar sjálfir.

Skólagjöld eru mjög misjöfn eftir löndum. Og þau eru oft há í enskumælandi löndum meðan þau eru lág eða engin í ríkisháskólum í öðrum löndum. Á Norðurlöndunum eru engin skólagjöld í ríkisháskólana og á það við hvort sem kennt er á ensku eða ekki. Við fjöllum í byrjun næstu viku um nám og búsetu á Norðurlöndum.

Möguleiki er á því að fá að borga sömu skólagjöld og Bretar og aðrir frá Evrópusambandslöndum, í stað þess að borga gjöld sem geta verið þrisvar eða fjórum sinnum hærri.

Ein leið til þess er að fara til Bretlands til þess að vinna til að byrja með og sækja um dvalarleyfi sem atvinnuleitandi í einhvern tíma áður en nám hefst. Um þetta gilda reglur og vinnan þarf að tengjast náminu sem farið er í.

Öll lönd Evrópusambandsins ásamt Íslandi, Noregi, Sviss og Lichtenstein teljast til evrópska efnahagssvæðisins. Dvelja má í öðru landi á evrópska efnahagssvæðinu í allt að þrjá mánuði án þess að skrá sig í landið og fá dvalarleyfi. Eftir það þarf að sækja um dvalarleyfi (residence permit) á viðkomandi skrifstofu.

Þegar maður sækir um dvalarleyfi þarf oftast að sýna fram á að maður geti fjármagnað sig í landinu og vera með gilt vegabréf. Einnig er gott að hafa með sér nokkrar passamyndir og alls ekki að gleyma að taka með sér evrópska sjúkratryggingakortið hjá Tryggingastofnun ríkisins og lesa skilmála um notkun þess.

Hér finnast upplýsingar um skráningar tilvonandi nemenda í Bretlandi: http://www.ukcisa.org.uk/

Atvinnuleit í Bretlandi er ekki eins einföld og áður og gott er að gera ráð fyrir því að taka góðan tíma til hennar. Til að byrja með má litast um á evrópsku ungmennagáttinni. Hún er ætluð ungu fólki sem langar til að vinna í öðru Evrópulandi. Þú ferð beint inn á síðu sem heitir „Working“ og þar fyrir neðan eru fjórir valmöguleikar, þar geturðu valið: Finding a job. Sjá hér: Evrópugáttin.  Þá má líka athuga vefsíðu EURES, (European Employment Services).

Til að eiga betri möguleika á starfi er tilvalið að útbúa góða ferilskrá. Europass er stöðluð menntunar- og starfshæfnismappa. Í henni þurfa að vera fimm skirteini eða skjöl. Þau eiga að ná utan um menntun þína, starfsþjálfun sem þú hefur hlotið, starfsreynslu, tungumálaþekkingu og reynslu af menningu og loks persónulegri hæfni.

• Evrópskri ferilskrá

• Mati og viðurkenningu á starfsmenntun

• Viðauka við prófskírteini

• Starfsmenntavegabréfi

• Tungumálapassa

Sjá nánar hér: 
Allt um gerð Europass.

Húsnæði er dýrt í Bretlandi. Leiga er oft borguð vikulega og 1-2 ja herbergja íbúð í London getur kostað allt að tvöhundruð þúsund krónur á mánuði. Hins vegar má vel finna ódýrara húsnæði og vega og meta kosti þess að búa í fjarlægð frá vinnustað eða skóla ef samgöngur eru góðar. Á CasaSwap.com – (International youth & student accommodation network)- geta stúdentar í leit að húsnæði erlendis skráð sig í húsnæðisleit og einnig skráð sitt húsnæði til leigu eða skipta.

Að margra mati er fullkomlega afstætt hverja má telja bestu skóla og háskóla heims en í flestum skýrslum komast skólarnir: London School of Economics, Imperial College, University College London og The School of Oriental and African Studies í efstu sætin á heimsvísu.

Vinsælastir meðal íslenskra stúdenta eru til að mynda London Business School og ýmsir listaháskólar í Bretlandi, svo sem Saint Martins þar sem fatahönnuðir og grafískir hönnuðir blómstra og Rose Bruford þar sem nokkrir íslenskir leikarar hafa stundað nám.